Rückblick Herbstanlass 2017

IMG_9681

Au das Joohr het d’Jumo wieder flissig Räbä gschniitzt. Am halbi 2i händ siich alli troffä und es chliises Istiigsspiel gmacht. Nach dem sind d’Chind i 6 Gruppä iteilt wordä. Es hät drüü verschiedeni Postä geh, wo mer sich handwerklich und sportlich ustobä het chönnä. Biim Räbäschnitzä sind wunderschöni Liechter gschnitzt wordä, i dä Aula-Turnhalle isch Würfelfuessball gspielt wordä und i dä Huuswiese-Turnhalle sind die grösstä Burgä baut wordä.

Nach dem all ihri Räbä gschnitzt gha hend, isch die ganz Jumo id Kaplanei gloffä. Det het s Chuchiiteam Sandro & Mario schoo uf d’Chind gwartet. Alli händ im Sääli vu dä Kaplanei Platz gha und det ihri Spaghetti chönnä schnabulierä.

Nach em fainä Z’Nacht het’s en chliinä Umzug dur d’Quartier vu Kaltbrunn geh. Natürli händ d Räbäliechtli glüüchtet wie no nieh. Zudem anä isch natürli au nu s’eint oder ander Lied gsungä wordä. Druffabe isch die ganz Jumo inklusiv dä Eltärä id Kirchä gangä und het det en schönä Gottesdienst under em Motto „Liecht“ dörfä erläbä.

Am halbi 8i isch dä gsamti Allass verbii gsii und mer het sich vor dä Kirchä verabschiedet.